kommen mit 14. schiffen, von Orlich mit des Herren hilff von Gotland, vnnd haben allda gelegen ein zeytlang, auf meines G. H. auss Preüssen, hylff vnd schiff gewartet, biss vns Gott wind vnd wetter hat geben, des wir zu jn kommen sind, Der Schwedische Ammeral, ist ein schiff von 500. lasten, wol gstafiert mit grossem geschütz, vnd haysst das schiff, das Schwedische Krafeel, odder Bolam, oder der Bar, vnd ist das best besigelte schiff inn der Ostersee auff dissmal gewesst.
Item den 23. tag Maij, Hat vns mein Gnädiger Herr, Fürst von Preussen, laseenn zu sigel gehen, vor dem Künigsbergischen tieffe, mit sechs schiffen von Orlich, die wol gestaffiert mit gweltigem vnd grossem geschütz, vnnd haben noch ein schiff meines G. H. müssen dahinden lassen, biss er hernach ist kommen, vnser Ammeral het gehayssen der Nar, ein schiff mit dreyen Marsen.
Auff den 25. tag Maij vnngefärlich, sinnd wir mit der sechs schiffen vnder Gotland zu meines G. H. schiffen kommen, Do wir jre Flot erkannt haben, vnnd sie vns, do sind wir inn ein Flot zusamen gelauffen, biss vnder Oland, da ist vns der wind entgegen kommen, vnd mussten allda setzen, oder vor ancker.
Item den nechsten tag darnach, sind vnns auss der Westersee entgegen kommen (do wir gelegen sind) 14. schiff kauffart, die haben nach Tantzken und anderen stetten gewölt, Sind von vnseren gnädigen dreyen Herren angehalten worden, von denen hat ein yeder Herr, eines bemanet mit geschütz vnd kriegsuolck, vnnd die andern min Tantzken vnd Künigsbergs sigeln lassen, vnnd eins theyls mussten mit den dreyen bey vns bleyben.
Item den 29. tag Maij sind wir zu sigeln gangen, vnd nach Bornholm gelauffen.
