Vnd vnsere Herren sind mit disen Herren imm lager vor
Koppenhagen vbereins kommen, das sie das tieffe wolten
sencken, vnnd ein schantz an dem strönd machen, oder wasser,
vnd geschütz darein füren, inn der nacht, vnd auff den
morgen das schiff beschussen, vnd ist bestelt worden, auff
dem wasser bey vns, wann man begunnet zu schiessen inn
das schiff, so solten wir mit den botten darbey sein, das
schiff einzunemen; ehe dann es zuuil serschossen werde, das
ist etlicher mass bey vnns versaumet worden, habend das
schiff zu seer lassen zuschiessen.
Den 29. tag Augusti, habend die vnsern auf land auss dem läger, den Helick beschossen, vnnd den also eingenommen, die noch darauff gewesst sind, zum tayl erschossen worden, vnd ein part gefagen, habend das mit vnsern büten eingenommen, vnd die auss der statt wider in die statt gjagt, bayder zu wasser vnd land, vnd wir habennd den Helick bracht, bey des brack, da ist er zu seer geschossen gwesst, vnd ist daselbst gesuncken, vnnd wir habend ein schiff, haysst die Hamburgerberg, zuuor das K. M. C. Ammeral ist gewesst, bey das gesenckt, vnd noch ein Boiert, eine Jacht, vnd etliche schutten, Die von Koppenhagen habend gross arbaite vnd schiessen gethon auss der statt vnd schiffen, vns dazu wören, Aber wir habend vns daran nicht gekert, vnnd sie vns auch nicht grossen schaden gethon.
Wir habend auch vil gross geschütz auff jrem schiff von jhnen genommen, vor Helick geborgen, halbe Carthaunen, Feldschlangen, vnd gross eysere geschütz, vnd wir habend das tieffe gesenckt das kaym grösser schiff kan ausskommen, dann das drey oder vier elen tieff gehet, wann das hochwasser gehet, wann aber kayn hochwasser do ist, als dann offt geschieht, das es zwu elen felet, vnnd mer, vnnd vider wechst, so künden kaum schütten daraus kommen.
