| 68 | Ældre |
at a iorð fellr. böte .vi. aurum. oc .vi. aura ef kamstaðr verðr i hofðe manne. vitni scal sa hava er særðr er. ef sa dylr. at sva morg bein leyste ór sem hann segir. Nu scal sór oll meta a brioste. En holfo dyrra a bake en a brioste. Nu verðr maðr staddr við deilld manna. oc vill eigi skilia þa. oc hvargom tya. þa scal hann giallda slanbaug kononge .xii. aura.
186 Nv a engi maðr rett a sér oftarr en trysvar. hvarke karl. ne kona. ef hann hemnisc eigi a milli.
187 Nu deila menn at oldrhusi. at monnum drucnum. þa scolo þeir út ganga er deillt hava. oc koma aftr um morgon. er menn vacna. þa megu menn döma um söc þeirra þar sem a þingi. ef þeir kunnu log. Sessar mannz bere vitni með hanom. æða matunautar. æða nasessar. æða oldryckiar. ef eigi ero hinir við. þat scal standa er þeir bera. föra ecki andvitni a mót þeim. En hver maðr er holfo dyrri at rette sinum þar en heima. Nu megu þeir setia þa söc þar. ef þeir kunnu log. ellar a þing skiota. Nu mælir þat armaðr. æða lendr maðr. at þeir hava misdeillt. þeir kveða við þvi nei aller. þa scal hverr þeirra taca boc i hond ser. oc sveria þess aller at þeir drucku þar sattlega. Nu er sa saklaus er sverr. en sa a bauge at böta kononge er eiðfall verðr. En hinna hverr syni með lyritar eiði er misdeilld er kend. En ef eiðrinn fellr þeim. þa fellr til .xv. marca vitis hverium. Nu gengr fiorðongr manna i fra oc vill eigi sveria. þa ero aller ólhúsmenn vittir. En ef færre menn ganga fra. þa ero þeir seckir er fra ganga. böte bauge kononge. en hinir hallde eiðum upp.
188 Hvervetna þess er maðr er staddr við deilld manna oc er skirskotat undir hann. þa scal hann bera annat tveggia af. æða a. ellar giallde aura .iij. kononge ef hann er krafðr til.
189 Nu veitir maðr ofundar drep manne öðrum i flocke. Nu ef sa fellr er drep veitir. þa fellr hann þar utlagr. oc uheilagr. En ef undan rennr til skogs. þa scolo aller efter renna. oc engi firi standa. En ef sa fellr er forstoð veitir. þa fellr hann þar utlagr. oc eigi fe hans utlagt. Skiota ma maðr skapte æða skiði. æða föte sinum firi þann er epter rennr. um sinn ef hann vill. oc hefta hanom sva rás. En ef hann gerer meira at. þa er han seccr .xl. marca við konong. firi þvi at þa veitir hann forstoðu utlogum manne. En ef hann verðr hondum tekinn i þeirri ras.
- Jvfr. Cap. 187 F. IV, 14. 15.
