| Gulathings-Lov | 63 |
er kona mannz. onnur systir. þriðia dotter. fiorða moðer. fimta stiupmoðer. setta broðor kona. siaunda sunar kona. Nu ef maðr hittir mann a einni hverri þeirra. þa scal hann viga at þeim manne ef hann vill. oc segia þeim manne er fyst kömr hann til. oc hvat at sokum var. Nu scal hann lita at orvar skurð ervingia hins dauða. ef hann er innan fylkis. æða skere sialfr orvar. Nu scal hann a þing fara. oc leggia niðr vapn sin utan þings. oc æsta ser griða. oc bioða log firi sic. oc föra fram vitni þeirra manna er hann fyrst hitti. Nu ef menn synia hanom þinggongu. þa helga þeir hann oc eyri hans. alt þat er er. þa er sa utlagr. er fallenn er. en eigi er fe hans utlagt. en sa fare heilagr er vig vá. þat er i öðrum stad ef maðr stendr annan i buri sinu. oc hever hann laðet sér þar byrði fiar oc fata. þa ma viga at þeim manne ef hann vill. Gange hann efter grönnum sinum oc syni þeim at vigi. oc niote vitnis þeirra a orvar þingi. þat er þar enn i þriðia stað. ef maðr stendr annan i kvi sinni. æða i fiose. oc leggr hann þar band a fenað han or vill i brott leiða. þa ma hann viga at hanom ef hann vill. Gange hann enn efter grönnum sinum oc syni þeim at vigi. oc fare enn a þing með vitni sin. þa utlæger hann æ þann i ollum þeim stoðum er ec hevi nu talt.
161 Ðat er þar enn þa ef þu finnr mann vegenn a morku uti. þa scal hann hylia þat lik fyst. oc segia hinum fyrsta manne til. er hann hittir. oc sökia fund ervingia ef hann er innan fylkis. ellar skal hann þingboð skera. oc kenna þing. Nu er sa vittr at .vi. aurum er heima sitr um þat þing. þat heiter þingvitit micla. Nu ef hann gerer eigi sva. sa sannar hann ser vig a hendr. ef ervingi vill hanom kenna.
162 Nu biðr maðr liðrs a hendr öðrum til einshvers. oc vigr hann mann þeir þar koma. þa scolo þeir sciliasc við mannzbana. oc böta bauge kononge hverr þeirra firi misgongu. en þa .xl. marca ef þeir fylgia brott mannzbana. Nu verðr maðr utlagr a þingi. oc bu hans oc fe hans. þa scal armaðr gera fimtar stefnu skulldar monnum ollum til. have hverr sina skulld þeðan sem vattar vitu. fyrr en armaðr take. nu eignasc iorð allt þat er rotfast er. have skulldar menn þar sitt oc.
163 Nv er sveini mannz vig kent. þa scal drottenn hans synia slicum eiði firi hann sem firi sialvan sik. En ef eiðr fellr. þa fellr drotnenom siolfum til utlegðar. En sa er eigi ma eiði firi koma. segi þræl afhendan ser. ella böte .xl. marca. siðan domr kömr a hendr hanom.
- Jvfr. Cap. 161. F. IV. 24.
