| 48 | Ældre |
þingat til sem hon var. meðan hon rann rett. Engi scal firi öðrom spilla. ne veiði stoð banna. ef hann hever haft at forno fare. En hvervetna þess er menn eigu lax a. þa scal hverr gera veiði vél i sinni a. oc gera þo sva at fiskar megi fara up at á hverri. Ganga scal guðrsgæve til fiallz sem til fioru. ef gengit vill hava. En sa maðr er gerðir firi. þa scolo þeir er firi ovan eigu gera hanom fimtar stemnu af þingi. at briota ór ef at ulogum er i gorr. En ef hann vill eigi ór briota. þa scolo þeir æsta liðrs til at briota ór. en hverr bonde er seccr at .iij. aurum er syniar hanom til at fara. En þeim viðar veiði er firi ovan bua. Engi scal fara i annars a at veiða. nema hann vili þeim veiða er ána a. oc giallda landnám þeim er ána a.
86 Hvervitna þess er menn skilr a um sætr. Nu letr annarr dóm hallda firi. þann dom a sætr at hava. sa er vitni berr til. nema annarr have fleiri vitni. Nu skilr menn a marcteig. oc letr annarr dóm hallda firi. þann dom a marcteigr at have[1] sa er vitni berr til. nema annarr have fleiri vitni. Hvervitna þess er menn skilr a um sætr. æða a marcteig. æða a marcreinu utangarðz. þa hever sa sitt mál er vitni berr til. Nu hever hvartveggia vitni til. þa scal sa hava sitt mál er sveria vill til. Nu vilia baðer sveria til. æða hvarge. þa scal briota sundr i miðiu þat er þa skilr a. Of marcreinur[2] allt þat er menn skilr a. þa ma vitni bera um hverr er vill. frials oc fulltiða. hann scal sva at orðom kveða at her skilr. oc þa er rett. Nu skilr menn a um sætr. æða a marcteig.[3] sa scal hava er haft hever .xx. vetr. æða .xx. vetrum lengr uillt oc uspillt. oc vitu þat vattar með hanom. Sa scal dóm hallda firi er haft hever. en sa scal stefna hanom til marcteigs. oc til dóms er eigi vill una. eigi skemrom en .v. nottom firi. þingat scal hann þa fara er at þeim degi kemr. með dömendr sina oc vitni þau oll er hann þarf. dömendr sina scal hann setia þar sem hann kallar merki. Hinn scal setia halvan dom við hann er mál a mote hanom. Vitni scal sa lata bera er söker. þat at hann stemde hanom þangat. en þat annat. at þau se merki er hann segir. þa er þat satt. nema annat kome meira i gegn. oc auki. þa er merki sem þeir bera. En ef þeir ero baðer iammarger. þa hava þeir sitt mál er fyrri baro. En ef ecki er vitni. þa scal sa hava sitt mál er sveria vill til. En ef hvárge vill sveria til æða baðer. þa scal briota sundr i miðiu þat er þa skilr a. sva scal hvervitna. er menn skilr a merki. sem ec hevi nu talt. oc scolo þeir þar dom setia a marcteig. Nu er þeir hava dom sett. þa scal sökiande niota vatta sinna. Nu megu aller menn þat vitni bera. þo at hann være þræll oc vann i þann teig. oc er hann þa frials. Nu scal sa þeirra hava þann teig. er meira vitni hever til oc betra.
