38 Nv er sa dauðr er skulld atte at giallda. en hinn livir er heimta a. þa kemr hann eigi til skulldar. nema hann kome með vattom. þvi at engi scal vinna eið firi briost hins dauða. En hann scal þann eið vinna. at eigi var su skulld sva at ec vissa. þa vinnr han firi sitt briost. en eigi hins dauða.
39 Nu stendr skulld .xx. vetr. æða .xx. vetrum lengr. þa fyrnizt su skulld firi vattom. En hann ma koma hanom til eiða at hvaro. þvi at i sallte liggr soc. ef sökiendr duga.
40 Nv scolo kaup oll hallda handsalað. oc þau er vatta vitu. ef þeir menn kaupasc við. er kaupum sinum eigu at raða. nema maðr seli uheimillt æða se fár i. þa scal kaup þat aftr ganga. en hinn hava andvirði sitt. Engi várr scal selia oðrom fox. ne flærð. en sa er fár gerir i. hann er seccr morcom .iij. þat er allt fár er menn meta til fárs. ef maðr kaupir sand æða saur. þar sem hann hygsc kaupa miol æða smior. oc allt þat er eigi ma utan a sia. Oll scolo hallda handsalað mol. þau er hallda megu. þat ma eigi hallda ef þu selr manne þat er þu hevir fyrr öðrum sellt. En ef sa hever hond at er siðar keypti. þa ma hann hallda skila dome firi kaupi sinu. Nu a sa kaup at hava er fyrri keöpte. ef hanom fullnast vitni at skila dome. þa er þeim kaupfox er siðarr keöpte. þa scal hann skirskota undir valenkunna menn. þat er oc kaupfox. ef maðr kaupir þat. er hinn atte ecki i er sellde. nema at þess raðe være sellt er atte. Nu scal hann hitta þann er hanom selldi oc heimta sitt af hanom. En ef hann vill eigi i hond hanom selia. þa scal hanom heim stefna. oc niota vatta sinna at þu lezt at logum laust. oc krevia hann fiar þins. og leggia hanom rán við.
41 Nu selr maðr kyr a leigu. þa scal sa ku abyrgiasc at ollu er hever. oc selia slica aptr sem han tecr. nema hon se ellri. Nu scal hann ku hava at leigu mala rettom til gangdaga at oðro vare. þvi at þa scolo kyr a for væra. nema þeir have annan eindaga a mælltan sin i mellom. þa er hann toc ku. Nu er su kyr dauð en hann atte veð i annarre. þa scal hann þa hava firi sina ku. þvi at kyr scal i kyr stað koma. En ef su livir. þa scal hann sina hava. En ef lester ero að orðner. þo at horn brotne. æða hale slitni. a scal hann þa lostu böta. Nu vill hann eigi ku leiga lengr. þa scal hann þann hitta er ku a. ef hann er innan fylkis. oc bioða hanom ku sina. En ef hann er eigi innan fylkis. þa scal hann föra heim ku. oc leiða menn til oc lata sia ku. at hon se heil oc hinum töc er a. þa segi hann af abyrð sina. oc veiti vorð ku sva sem sinum nautum. oc þiggi af nýt oc have þat firi gras oc gæzlo. oc abyrgisc
- Jvfr. Cap. 38 F. X. 23.
