På fjellet
| På fjellet av Kristofer Janson |
Hu hei! kor er det vel friskt og lett
- uppå fjellet!
her leikar vinden i kåte sprett
- uppå fjellet!
og foten dansar, og augat lær,
og hjartat kveikjande hugnad fær
- uppå fjellet!
Kom upp! kom upp frå den tronge dal
- uppå fjellet!
her bles ein blåster so frisk og sval
- uppå fjellet!
og lidi skin utav blomar full,
og soli drys alt sitt fagre gull
- uppå fjellet!
I dalen starvar du tung og heit,
- kom på fjellet!
kor fint her er, inkje nokon veit,
- her på fjellet!
dit auga flyg yver nut og tind,
det er som flyg det i himlen inn
- uppå fjellet!
Og når no soli til kvila gjeng
- attum fjellet,
då reida skuggane upp si seng
- attmed fjellet,
då giddrar alt i ein strålestraum,
og hjartat sveiper seg inn i draum
- uppå fjellet!
- Denne utgåva henta or Ja vi elsker. Norge i dikt, Redaktør: Dr. phil. Rolv Thesen. J.W. Cappelens forlag, 1941.