| 280 | Anhang til d. ældre Fr. L. |
61 Sv er hinn siaunda erfð er tekr frillo sun ef hann er til. En ef enge liver i siaundu erfð i baugillde nema broðer skilgetinn. þa take fyrr broðer hans i siaundu erfð laungetinn. ef hann anndaz barnlaus. helldr en i attando erfð gange. En ef hvarge er þessara til þa tekr frilludotter.
62 Sv er hinn attanda erfð er taka efter bræðra sunu oc er at þriðia manni frændsemi þæirra i huaratueggio halfo. En ef þæirra misser. þa skulo taka konur þær er epter ero bræðradætr.
63 Sv er hinn .ix. erfð er tekr moðurfaðer oc dottursun. þæir eigu baðer einn arf at taka oc verðr huartueggi annars arfe. en ef þæirra misser. þa tekr moðurmoðer oc dottur dotter. hvartueggia þæirra epter aðra ef annarrar misser.
64 Sv er hinn .x. erfð er tekr moður broðer oc systor sun. þæir eigu baðer einn arf at taka oc verðr hvartueggi annars arve. En ef þæirra misser þa tekr moður syster oc systur dotter. þær eigo baðar einn arf at taka oc verðr hvartueggia annarrar arfe.
65 Sv er hinn .xj. erfð er taka þæir menn er ero tueggia systkina syner karls oc kono. þæir eigu baðer einn arf at (ta)ka.[1] oc verðr huártueggi annars arfe en ef þæirra misser þa skulo taka tueggia systkina dætr karls oc kono. þær eigu baðar einn arf at taka oc verðr hvartueggia annarrar arfe.
66 Sv er hinn .xij. erfð er taka systra tueggia syner. þæir eigu baðer einn arf at taka oc verðr hvartueggi annars arfe. En ef þæirra misser. þa take þær konor er systradætr ero. þær eigo baðar einn arf at taka oc verðr hvartueggia annarrar arfe. Sua er oc mællt at i þæirri erfð skal hverr taka arf sem hann er talðr i. oc enge take arf fire henndr auðrum fram.
67 Sva er oc mællt oc talt i logom manna ef maðr verðr fire þæirri villo at hann vegr mann til arfs þa hever hann fire veget þæim arfe. en arfr sa fare at rættom erfðom senl sa maðr væri eigi til er mann vegr til arfs.
68 Sva er oc staðfest um allt landet með konongs raðe. at þegar er maðr fester ser kono at guðs logom oc samþykt beggia þæirra. þa ero þau bornn er hann a með þæirri kono aull loglega til arfs komin hvárt semþau ero geten fire festeng eða epter.
69 Sv er hinn .xiij. erfð er þæir gavo syner Magnus konongs berfæz. Sigurðr konongr oc Eysteinn konongr oc Olavr konongr. er taka skulo foðurbroðer oc broðursun
- Jvfr. Cap. 69. F. VIII. 15.
- ↑ I Mbr. atka, rettet af Arne M. i hans egenh. Afskr. til: at taka.
