| 106 | Ældre |
þa taca .ij. aura hvarer. En setta manne i kvensvift .iiij. ærtogar. Slict skal hverr taca af giolldum efter iamskylldan mann. sem böta með iamskylldum manne. Hvervitna er bött er feðr. þa er bött syni. nema þar sem faður broðer hins dauða. oc synir hans oc bröðrongar. þa scolo þeir hvárer sina bot taca. oc sva böta með veganda faðurbröðr hans oc bröðrongar iamt sem taca efter hinn dauða. En þegar er faðurbroðer er ifra fallenn. þa taca bröðrongar sinn einn rett. oc sva böta. En hvervitna er dötr liva efter þann er bötr tecr. æða gellðr. oc eigu þær sunu. þa scolo synir þeirra böta oc taca slict sem tala rennr til. En hverr sem fe helldr þvi er hann a at böta. æða beiðizt meiri bota en hann a at taca. oc verða þeðan vandræðe af. þa heiter hann tryggrove.
317 Þetta skal sa taca. er sunr hins dauða heiter. oc við giolldum tecr ef dömdar ero .v. mercr gullz. efter þann er af er tekinn. oc fylgir þeim .v. morcom gullz bæðe bötr oc baugar. oc sakar allar. þa scal sunr hins dauða taca .x. mercr vegnar. En broðer hins dauða .v. mercr vegnar. En faður broðer hins dauða. ef hann livir. oc synir hans. einn eyri oc halva fiorðo morc. oc þriðiung siaunda pennings. En ef faður broðer er ifra fallenn. oc liva efter synir hans bröðrongar hins dauða. þa scolo þeir hava .vii. penninga. oc .xviii. aura. En ef faður broðer einn livir barnlaus. þa scal hann hava halvan .vii. penning. oc .xi. aura. En ef hann a dötr. oc eigi sunu. oc ero þær yngri en fertogar þa er giolld ero gor. þa scal faður broðer taca dottor sunum sinum til handa. ærtog minna en .vii. aura. En ef hann a ecki barn nema friðlu sun. þa tecr hann þa ærtog minna en .vii. aura. er dottor synir skylldu taca. En ef oll ero til. skilgetner dottor synir. oc friðlu sunr. oc skilgetner synir. þa fylgir friðlu sunr bröðrom sinum til rettar. oc tecr hann umfram þeirra rett. holfum .vii. penningi minna en halva morc vegna. En ef þær deyia barnlausar. þa hverfr sia bót til þess er við giolldum tecr. En ef faðer livir hins dauða. oc tecr sunr við giolldum. þa scal hann hava .xx. aura. En ef hann er eigi til. þa hverfr sia bót til þess er við giolldum tecr. En ef faður broðer sammöddr er til. oc broðer sammöddr. þa tecr broðer sammöddr .x. aura. En faður broðer sammöddr .v. aura. En ef hvarge er þeirra til. æða þo at annars missi. þa hverfr sia bot til þess er við giolldum tecr. En þetta verðr allz er þesser menn taca. ærtog minna en holf þriðia morc oc .xx. En ef maðr a stiupsun. æða stiupfaður. sa er af er tekinn. þa scal sa er við giolldum tecr. böta af þessum rette er nu er taldr hvarom þeirra .X. aurum vegnum. En ef þeir namágar ero til er hvárr a annars systur. þa scal sa er við giolldum tecr böta þeim .x. aurum. En ef einfolld var mægð þeirra böte .v. aurum. En ef efter livir hinn dauða bæðe moðor faðer oc dottor sunr. þa taca þeir af giolldum einn eyri. oc .iij. mercr vegnar. halvan .xiii. eyri hvárr þeirra.
