hans. Nu ef hann hever rett skoret ór. þa scolo þeir fara með hanom sva lagnt sem hann vill. Nu ef þeir hitta a her. oc þurfu þeir at rioða odd æða egg til þess fiar. þa eigu þeir fe er taca. oc skipti sin a milli. En ef þeir þurfu eigi þess við. þa a sa fe er fyrr atte. Nu taca þeir kaupskip oc briota bulca undir monnum. oc föra farm i herað aptr. oc sættazt þeir við konong. þa fara hinir efter er renter varo. oc sveria til fiar sins. þa scolo þeir þat aptr giallda allt. nema þeir rindi eiði þeirra með iarnburð aptr. Nu fara þeir er heriat hava firi land fram. oc kaupir maðr at þeim grip einnhvern. þa scal sa fe hava er fyrr atte. oc komasc með tveggia manna vitni at. En sa er við vikinga keypti. giallde .iij. mercr kononge. En ef hann fær eigi vitni a hond þeim. er fe rang fengit hever keypt. þa scal stemna hanom til þings. þa eigu þingmenn hanom fe at döma. ellar lyritar eið firi. Nu scal sa eiðr standa sem hverr annarra tiu vikur svörra daga. En su er oll vica svör. er einn dagr er svörr i. þa scal hann stemna hanom .v. nottom firi til kirkiu þeirrar er hann vill innan fiorðongs. Nu scal hann firi vattom eið vinna. nemna menn til tva at heyra eið. þeir scolo eið meta. En ef þa skilr a. kveða aðrer rett uunna en aðrer ragnt. þa scolo þeir sitt mal hava er sveria vilia um. En ef hvarertveggia vilia sveria um. þa scolo þeir eiði nerr er hialpa vilia. En ef eiðrinn fellr. þa fellr til þess at hann giallde hanom fe sitt. en kononge .iij. mercr.
Nu hafum vér landvorn vara a skra setta. oc vitum eigi hvárt þat er rett æða ragnt. En þo at ragnt se. þa scolom vér þat logmal hava um utgerðir várar er fyrr hever verit. oc Atle talde firi monnum i Gula. nema konongr várr vili oss öðrom iatta. oc verðim vér a þat satter aller saman.
315 Þat eigu Vikverir at gera sextigu tvitugsesna. og gröna skip firi. Egðir scolo gera .xvi. skip halfþritug. Rygir scolo gera .iiij. skip oc .xx. halfþritug. En Horðar annat slict. Sygnir .xvi. skip halfþritug. Firðir .xx. skip halfþritug. Mörer .xvi. skip halfþritug. Raumdöler .x. skip tvitugsessur. Norðmörer .xx. skip. tvitugsessur. Ðrönder atta tigir tvitugsesna. Naumdöler .ix. tvitugsessur. Haleygir .xiii. tvitugsessor. oc eitt þritugt skip .vii. i syðri holfo. En .vi. i nörðre holfo. þvi at þeir eigu varðhalld austr.
316 Þetta[2] skal sa taca. er sunr hins dauða er. oc við giolldum tecr ef dömdar ero .vi. mercr gullz. efter þann er af er tekinn. oc fylgir þeim .vi. morcum gullz beötr oc baugar. oc sakar allar. þa scal sunr hins dauða taca .xii. mercr vegnar. En broðer hins dauða .vi. mercr vegnar. En faður broðer ef hann livir .viii. ærtogar. oc
