| 98 | Ældre |
gerð hina nesto. en þa have i tal með sér. Nu sitr maðr sva vetr .iij. at hann gerir eigi gerð. oc telr sic hverge i tal. þa er hann maðr utlagr. Nu telr maðr sic i tal. oc helldr eigi gerð up. þa scal armaðr sökia hann til leiðangrs vitis. tala rennr til. Hvervitna þess er almanna tal er. þa scal setia manngerð fra landzenda. oc væra þeir sér er nester bua. Laupi engi ivir hofuð öðrom. nema þeir verðe a þat satter. aller saman. Manntals skal engi öðrom synia. En manntals þing skolo aller böndr sökia. Nu ef þu villt manntals krevia i annan attong. æða i annan fiorðong. þa scal a þingi krevia. En ef þeir synia þer manntals oc iamnaðar. þa matt þu telia skorð a hendr þeim með svörom. Nu förer maðr bu sitt i annat fylki. æða i annan fiorðong. þa scal sa eigi taca verð firi skip sitt. oc eigi kaupa sér annat. oc ganga þar i tal sem hann vill. Nu ef hann gengr þar i tal sem skip er i gerðum. hallde slicu upp sem maðr oc annarr. Nu ferr maðr or gerðum. oc ferr i log onnor. late liggia efter gerð hina nesto. Nu ferr maðr af lande. hallde upp gerð firi hann vetr .iij. En ef su fellr. söke viti af hanom er hann kemr heim. Ef maðr kemr or logum varom i fylki annat með bu sitt. geri aptr gerð hina nesto. sem hann var fyrr. En siðan hallde gerð upp þar sem hann kemr.
299 Sa scal skipi styra er konongr nemner til. En ef hann vill eigi. þa er hann seccr .vi.[1] morcom. En ef annarr maðr rener hann styri homlo. þa er sa seccr .vi. morcom. Nu scal styrimaðr nemna haseta með sér at fara. þa scolo þeir aller skylldir til at fara. ellar giallda mercr .iij. Nu er vel ef drengmenn vinnasc til. En ef þeir vinnasc eigi til. þa scolo böndr fara. þeir er firir yrkiendr eigu sér. þa er vél ef þeir vinnask til. En ef eigi vinnask þeir til. þa scal einvirki fara. scal einn fara en tveir scolo heima væra. at biarga bufe þeirra. Ef þa er skipat. en ellar fare tveir en einn se heima.
300 Sa scal matgerðar mann fa. er sveina a i skipreiðu. oc luta sin i mellom. Matgerðar menn skolo fararkaup taca sem hasetar. Skal bonde sa heima væra er matgerðar mann fær. nema skip se eigi skipat. Böndr scolo skylldir til stemnu at fara. þvi at eins drengmenn. ef styrimaðr vill. Nu scal styrimaðr gera stemnu ollom monnom til er skip scal skipa æða útdraga. En sa scal at .iij. aurum seccr. er eigi kömr til. Nu scal maðr fararkaup taca eyri a manaðe. en tva aura a tveim manaðom. Nu scolo böndr gera tva manaðar mate hvárs til homlo. oc tialld. oc ár.
- Jvfr. Cap. 299. 300. F. VII. 7. 24.
- ↑ I Mbr. har oprindelig staaet: .iij., hvilket den gamle Afskriver selv har overstreget og derpaa ovenover sat: .vi.
