| Gulathings-Lov | 81 |
242 Enn liggia við aurar .xii. ef maðr hoggr af manne dauðum hond. æða fót. æða torvo af hofðe. æða sva at heilir fellr út. æða sva at særer reðiar. æða sva ef hoggvinn er um raðza klof. oc sva ef hann hoggr bein ór hofðe. oc firi afhogg oll utan fingr æða tær. Eyri firi fingr hvern. oc tá hveria unnz af ero allar. þa er half morc firi hvárt. fiorer tigir marca firi heimsokn. þat a konongr halft ef maðr er viginn. En .vi. aura ef innangarðz er. oc adrer .vi. ef hofuð berr ór stað.
243 Nu scal haullz giolld telia. þar scal .xii. alna eyrir .vi. mercr i hofuðbaug. En fiorar i broðor baug. En holf þriðia morc i bröðrongs baug. Nu scolo fylgia tvau tryggva kaup baugi hverium. hvert scal eyrir oc fimtungr eyris tryggvakaup. En tryggva kaup scal fara bauga manna i mellom.
244 Nu reiðir vigande baug syni hins dauða. En tryggvakaup bröðr hins dauða. En annat bröðronge hins dauða. Nu reiðir broðer viganda baug bröðr hins dauða. En syni hins dauða tryggva kaup. en annat bröðronge hins dauða. Nu reiðir bröðrongr viganda baug bröðronge hins dauða. En tryggvakaup syni hins dauða. en annat bröðr hins dauða. at sættarkaupe ef frendr ganga aller senn til sættar. oc sva at sættes bauga manna. en .iii. mercr at skogar kaupi.
245 Nv scal vigande fram geva oc moðer hans oc dotter. oc kona hans. En hver ein gioven eyrir oc fimtungr eyriss. kono hins dauða oc moðor. oc dottor hins dauða. þa ero þat giaver .xii. Nu scal systir viganda geva halva giof systur hins dauða. oc halva giof kono hins dauða. oc dottor hins dauða. oc halva giof moðor hins dauða. Nu ero þat tvær giaver. Nu scal hvert þeirra vigande oc moðer hans. oc kona hans. oc dotter hans geva halva giof systur hins dauða. þat ero tvær giaver fullar. Nu ero .xvi. giaver allz. Nu með baugum oc med tryggva kaupi. oc með skogarkaupi. oc með kvengiofum. þa ero fimtungar tveir. oc tveir aurar oc .xx. mercr.
246 Þeir menn ero .vi. er hverr tecr .xii. aura söc. Einn er faður broðer. oc annarr broðor sunr. þriði broðor[1] sammöðr. fiorðe sunr þyborenn. fimti dottor sunr. sette moðor faðer.
247 Ðrir ero þeir menn er hverr tecr .ix. aura sök. Einn er moðor broðer. en annarr systur sunr. þriði broðer þyborenn. Systkinna synir taca .vi. aura.
- ↑ Saaledes i Mbr.
