65 Nu ero bröðr tveir födder upp anauðgir at eins mannz. oc ero þeir bæde bröðr oc fostbröðr oc leysasc þeir undan drotne sinum. oc firrasc eigi fostr. eigu saman verc oc orco. þa kemr hvartveggia þeirra til annars arfs. born þeirra koma eigi til. nema þeir geri frælsis ol sitt.
66 Nu scal leysingi hava þyrmslir við skapdrotten sinn. eigi scal hann i fevelom. ne i fiorvelum við hann væra. ne i domom i gegn hanom. nema hann eigi sitt mál at veria salfs. þa scal hann iamt firi hanom veria sem firi oðrom monnom. oc eigi iamnasc orðom við hann. oc hverva eigi odd ne egg a mote hanom. oc fylla eigi fiandflocc hans. oc bera eigi vitni a hond hanom. oc ganga eigi a hond ofrikis manne. nema leyvi hans se til. oc setia eigi dom annarra a mote hanom. En ef hann gerer einnhvern lut þeirra. þa scal hann fara aftr i sess hinn sama er hann var fyrr. oc leysasc þeðan verðaurum. Fe sinu hever hann oc firigort. Tveir scolu þeir feðgar [1] þyrmasc við hina tva. Ef sunr hans gerir einnhvern lut þessarra. þa seckizt hann við skapdrotten sinn verðaurum slicum sem faðer hans gallt. Vitni þau scal leysingi abyrgiasc .xx. vetr. at hann hever frælsisól sitt gort. En ef engi illir gerð hans a .xx. vetrum. þa scal þo gort vera at ugort se. ef hann vill þat segia. Kaupa ma leysingi arf bornom sinum. ef þeirr verða satter a. þa er þat iamfullt sem hann hafðe skirt far sitt. En ef þrot söker þau oc er keypt. þa scolo born þeirra vinna firi þeim meðan þau liva. oc ganga skulldlaust i braut. En ef þau vilia eigi þat. giallde fostrlaun þat þeirra er i brautt vill fara.
67 Nv ferr leysingi or fylki firi utan rað drottens sins. oc aflar sér þar fiar æða kaupa. þa scal skapdrottenn fara efter með vatta. ef hann vill aftr fara þa er vel. En ef hann vill eigi aptr fara. þa leiði hann vitni a hond hanom at hann er leysingi hans. oc före hann aptr hvárt sem hann vill lausan æða bundinn. oc setia hann i sess hinn sama. þar sem hann var fyrr.
68 Nu leypr þræll mannz. oc tecr maðr hann innan fylkis. oc utan fiorðongs. þa scal hann hava[2] eyri. En ef hann tecr hann utan fylkis. oc innan laga varra. þa scal hann hava .ij. aura. Nu ef hann tecr hann innanlandz oc utan laga várra.
- Jvfr. Cap. 66. F. IX. 10. 11. Cap. 68. F. X. 40.
