þat firirnemasc aller fylkismenn. þa scolo þeir hava þangat at váre öðro .xl. marca. þat eigum ver halft laugunautar. en halft a konongr várr. En ef þat firinemsc fiorðongr manna. æða attongr. þa scal or þvi fe telia. sem þeir eigu manntal til. En ef þat firinemasc einka menn. þa scal böta aurum .iii. Olafr. En ver scolom fa till þess mat. oc fe or fylkium .vi. halfs manaðar mat manne. nema leið se lengre. oc salld malltz oc eyri silfrs. En sa maðr er þat firinemsc at fa þar til. þa fellir sa forena firi þeim manne. þa scal hann böta firi þat aurum .iii. M. En or Egðafylki þa scal maðr fara or skipreiðu hverri. oc iamne skipreiðum. sva til at .xx. menn fare oc geri tva manaðar mate smeors oc sva miols. eyri vegenn silfrs. æða þat talt er slegit er þa or eyri. oc salld malltz. En sa scal fara er lender menn nemna til. æða ármenn. æða syslumenn. En þessa gerð scal gera epter fear magne. En þriggia punda smeor scal i þessa gerð gera. En or Rygiafylki .xv. menn or fiorðonge hverium. oc gere halvan annan manaður mat smeors manne. oc sva miols. eyri veginn. oc salld malltz. Oc iammarger or Horðafylki. oc reiði manaðar mat. hvars manne. eyri silfrs. oc salld malltz. En ór Sogne .x. menn or fiorðonge hverium. oc gera manaðar mát hvárs manne. oc eyri vegenn. oc salld malltz. En .xiii. menn or fiorðonge hverium i Firðafylki. oc gera manaðar mat hvárs manne. oc eyri vegenn. oc salld malltz. En af Sunnmöre gera hverium manne þeirra .xvi. ii. manaðar mate hvárs. eyri vegenn oc salld malltz. En sa maðr er þat firinemsk at fa þar til. þa fellir sa forena firi þeim manne. þa scal hann böta firi þat aura .iii. Olafr. Hvervetna þess er þingmenn verða vittir i Gula. þa scal þat fe þar verða reitt. En þat eigu aller Gulaþings menn. þa er vel ef hann sialfr reiðir. æða vinir hans. en ef han vill eigi. þa scal þat reiða armaðr konongs æða lendrmaðr. hverr i sinni syslu. oc taca holfo meira heima.
4 Ðat er nu nest at ver skolom geva manne frælsi úr her i Gula. En vér hafum þvi skipt fylkna imellom. at sitt ár skal hverr várr fa[2] mann til frælsis. En þeim manne skal frælsi gevet[3] drottensdag þann er fyrstr verðr a Gulaþingi. En ver skolom aller Gulaþings menn fa fe til aura .vi. En ef manne verðr eigi frælsi gevet drottensdag þann. þa scolo þeir menn er þann mann eigu at fa. böta aurum .xii. biscope. oc kaupa man. oc gefa frælsi. þo at siðarr se.
5 Þat er nu þvi nest at ver scolom manne frælsi geva i fylki hveriu i Gulaþings logum. En ver hafum þvi skipt fiorðonga imilli. En þeir menn er þann
- Jvfr. Cap, 4. 5. F. III. 19.
