I.
Christenretten efter No. 60 qv.
Kapitula af þriðia lut kristins rettar oc bærköyar rettr heitir.
i. Um barn skirsl.
ij. Hue lenge heiðin mann er föðande.
iij. Um barns vtt kast.
iiij. Vm vinnu eptir non hælghi.
v. Um fot a leko skipti.
vj. Vm brauð bacstr oc klæða þurkan.
vij. Um huða þurkan.
viij. Vm .ij. konor mundi köyptar
ix. Um kuænfangs tið eða hueria taka skal.
1 Þat er upphaf at bærköyar rette rettom. En þat er bærköyar rettr at barn huert er boret verðr skal kristna oc til kirkiu föra nema með þeím orbumblum[1] se alet sem i lagum er mællt. En oll annur born skal til kirkiu föra oc krístna. En ef barn er boret firir iola nott þa skal skirt vera firir iola nott eða bonde sa giallde biskupi .vi. aura. er barn þat husar. Sua sem fyr segir i fimta kapitula i fyrsta lut bokar.[2]
2 ij. Ef maðr hefir heiðin mann .xíj. manaðe þa er hann utlægr oc huer peningr fear hans. En slikan kristin dom eígum ver at hafa i kaupange sem i heraðe.
3 iij. En ef biskups armaðr kennir þat kono at hon hafe sleget vtt barne sinnu. þa skal su kona vitni vm bera er hialp henne at barnet var daut alet. En ef hon missir þess uitnis þa er hon sek .íij. morkum. uið biskup nema hon uili uinna .vi. eið oc fanga vitni.
4 iiij. En messo daga þa alla er non hællgr er firir oc verðr maðr hittr a uerkí með uatta .ij. siðan heilagt er. þa er hann seckr .vi. aurum uið biskup. En messo daga þa alla er heilager eru oc eigi er non hællgr firir oc verðr maðr hittr a uerki með ualta .ij. þa er hann seckr .iij. aurum uið biskup. Skip þau oll er bua a vatne fyr
