124 Nu eigo .íj. menn eða fleiri einn grip saman þa selr einn oc spyrr eigi hina at er með honom eigo. Nu vilia þæir riuva þat kaup. þa skal luta huerr raða skal. ef sa lytr er sellde þa skal hallda. en ef hiner liota er riuva vilia. þa skulo þæir riufa a fyrsta manaðe er þæir verða varer við en eigi siðarr.
125 Sa skal lan abyrgiaz er þiggr at koma heilu heim. En ef hann vil þat eigi. þa skal þat sækia sem vita fe. En þat er allt vita fe er vattar vito. Nu lér maðr eða selr þat er honom er lét oc misferr þat. þa ma hinn heimta af huarom sem hann vil. þæim er sællde eða hinom er keypte. oc sua huervitna þar sem maðr selr. eða lér annars eign.
126 Nv leggr maðr veð manne fire einnhuern lut. þa skal sa abyrgiaz veð er tekr. en ef þæir hava gorvan æindaga til nær út skal leysa. þa skal hann bioða i eindaga oc hava vatta við. en ef þa leyser enge ut. þa er þat forveða vorðet. En ef maðr a fe at heimta at oðrum manne oc tekr hann veð fiar sins. i einshueriom lut. huart sem þat er i iorðo eða annat fe. þa skal veð virða. Nu selr hann veð i brot oðrum manne. þa skal sa hava vatta til veðs sins er veð atte a fyrstom .xij. mauaðom ef hann er innan heraðs. En ef hann er utan heraðs. þa have hann brugðet a fyrstom .xij. manaðom er hann kemr i herað ellegar a hann þess mals alldre uppreist. Nu selr maðr tueim monnom eitt veð. þa a sa veð er fyrre tok. en hinom er veðflærð er siðar tok oc vito þat vattar.
127 Nu heimter maðr skulld at maune ef hann er innanheraðs oc skulldskeyter hann annan mann við hann. þa hever hann lokit þæirri skulld af hende ser ef þar ero vattar við at hann tok þann skulldarstað. Umage ma engom kaupom raða. Kona manz ma oc eigi meira raða en eyres kaupe. nema hann sende hana til skips eða i kaupstefnor at kaupa baðom þæim til þarfinda. þa skulo halldaz kaup hennar ufalsat. elligar skal hann riufa a fyrsta manaðe er hann væit oc þikke honom ofkeypt.
128 Nu kauper maðr verk at frialsom manne. þa skal þat allt halldaz er þæir verða asatter. En ef bonde vil eigi hallda mala við leigomann sinn oc visar honom or vist. þa skal hann krefia með vatta vistar sinnar oc bioða verk sin slik sem þæir verða asatter. Nu ef bonde vil eigi þat. þa er hann sekr .xij. aurom við konong. en hinn skal hava kaup sitt oc matarverð þat er uneyt er. En ef leigo maðr vil eigi hallda við bonda. þa skal hann krefia hann verka slikra sem hann iataðe honom. oc bioða honom vist með vattom. En ef hann vil eigi þa er hann sekr .xij. aurom við konong.
- Jvfr. Cap. 124. G. 48. Cap. 125. G. 49. Cap. 126. G. 50. Cap. 127. G. 55.56. Cap. 128. G. 70.
