| 236 | Ældre |
betri er lausn bersc á. helldr en þá er hon var selld. oc scal hann þat upptaca í slícum fiárlutum sem þá gengr. nema þeir sættiz á um lut or iörðunni. En ef[1] þetta er um þau mál er síðan geraz er bóc siá var tecin. en hin fyrru fari svá sem vitni bersc.
2 (ij.) Ef maðr vill iörð sína selia at forsölu. sá er forsölu máli réttr. at slícan eyri scal maðr taca sem hann reiðir. oc vill hinn er á iörð sína leysa. þá scal hann[2] hafa boðit hinum fé sitt fyrir helgu nott oc eptir Michialsmessu. oc hafa reitt í gangföstu[3] á þváttdegi siauvicnaföstu. en hinn scal reiða brent silfr eða gull móti iamnmiclu sem hann mátti caupa með því fé. þá er hann ceypti iörðina með. oc þá gécc gull eða brent silfr. En ef hinn vill fé sitt hafa. þá scal hann beiða fiár síns fyrir helgu nott með váttum. En ef cona er fiárhalldsmaðr oc á hon búanda. þá scal bióða báðum ef báðir eru nær. en öðru einu ef annat er nær. oc svá beiða hit sömu. En ef hann fær eigi fé sitt. þá scal eyri leggia á .v. aura oc fylgia landsleigan. oc leggia á laga leigu tólf mánaða hina næstu. en þat er laga leiga. eyrir á .v. aura hveria. Nú ef hinn villdi hafa fé sitt. þá cveði hann fé sitt eptir föstu oc nióti gagna sinna at dómi. En ef hann missir vátta þeirra er nær váru þá er hann fécc fé fyrir iörð. þá nióti hann þeirra vátta at hann bygði oc leigu tóc af næstu .xij. mánaði. En ef þá scill á hve scilt fé þat var. oc hefir sá eigi vitni til er fyrir fécc. sanni hinn einseiði er gelldr. at her er iamnmicit oc iamngótt sem fyrir var fengit. En ef hann vill eigi lúca við hann. þá stemni honum heim til iarðar þeirrar er hann á fé fyrir til stemnu oc þing síðan. oc kalli fullverði fyrir iörð þeirri. oc nióti vitnis síns allz á þingi. oc æsti búenðr vápnatacs at honum se siálfsceytt af iörðu svá micit sem hann tóc leigu af. nema hann reiði honum þá fé sitt. En ef féit slendr þá cyrt á .xij. mánaði. þá scal hann fara til annat vár eptir iól. oc kalla fullt iarðarverdit ef hann vill. oc stemni honum heim til iarðar þeirrar til þingstemnu. oc bióði hann sceytingar. En ef hann vill eigi sceyta honum iörðina. þá stemni hann honum þing. oc föri fram vátta sína alla á þingi at svá er farit allt sem hann segir. Nú ef honum fullnast vitni sitt til máls síns. þá sculu allir þingmenn veita honum vápnatac. þá scal iörð hans vera svá heimil sem óðal hans. svá micit or iörðunni sem hann fann fé fyrir iörðina. oc hann tóc leigu af. eða hinn reiði honum fé sitt.
3 Slíca iörð scal hverr aptr selia sem hann tóc. en ef betri er. þá stoði[4] honum þat. en ef verri er. þá gialldi[5] eptir því sem menn meta at verri er.
