Side:Norges gamle Love indtil 1387 Bd. 1 190.jpg

Fra Wikikilden
Denne siden er korrekturlest
190 Ældre

sacaucum tveimr. hann scal böta syni hins dauða þýbornum ertog oc .xj. aura vegna. en bröðr hins dauða sammöðra annat slíct. En bróðir veganda scal böta föðorfeðr oc sunarsyni hins dauða ertog oc .xj. aurum vegnum. En nú lifer eigi faðir veganda. þá scal bróðir veganda böta sacaucum tveimr. en föðor bróðir oc bróðorsunr einum sacauca. En nú lifer eigi bróðir veganda. þá scal föðorbróðer oc bróðorsunr böta sacaucum .ij. En bröðra synir oc eptir bröðra sunu veganda sculo böta einum sacauca. oc scal hverr taca trygðar á mót sinni bót oc fulla sætt. En nú lifa allir sacaucar hins dauða. en[1] engi lifer í bauggilldi veganda nema þeir er efzter[2] ero. þá sculu þeir þó böta öllum sacaucum. En þat verðr allz er sacaucar taca oc synir þeirra oc sunarsynir .xiij. peningum vegnum minna en .ix. mercr vegnar.

Um móðor föðor.

22   Móðorfaðir oc dóttorsunr veganda sculo böta móðorföðor oc dóttorsyni hins dauða ertog vegnum minna en .xj. aura vegna. en móðorbróðer oc systursunr veganda sculo böta móðorbróðor oc systursyni hins dauða mörc vegna. Systkinasynir veganda sculo böta systkina sunum hins dauða ertog oc .v. aurum vegnum. Systrasynir veganda sculo böta systra sunum hins dauða[3] hálfan .iiij. eyre. En þat verðr allz er micla nefgilldis menn taca .vij. peningum vegnum oc ertog vegnum minna en hálf þriðia[4] mörc vegin.

Um litla nefgilldi.

23   Nú segir til litla nefgilldis hvat þar scal hverr öðrum böta eða taca. Sunardóttorsunr veganda scal böta sunardóttorsyni hins dauða .vj. aurum vegnum. Dóttordóttorsunr veganda scal böta dóttordóttorsyni hins dauða .v. aurum vegnum. Bróðordóttorsunr veganda scal böta bróðordóttorsyni hins dauða [.iiij. aurum vegnum. Systurdóttorsunr veganda scal böta systurdóttorsyni hins dauða[5] .iij. aurum vegnum. Systkinadötrasynir veganda sculo böta systkinadötrasunum hins dauða .ij. aurum vegnum. Systradötrasynir veganda sculo böta systradötrasunum hins dauða eyri vegnum. En þat verðr allz er litla nefgilldis menn taca .xx.[6] aurar vegner.

Um bróðor þýborenn.

24   Bróðer þýborenn veganda scal böta bróðor hins dauða þýbornum .x. aura vegna. Móðorbróðir oc systursonr veganda sammöðra sculo böta móðorbróður oc systursyne hins dauða sammöðra ertog oc .v. aura vegna. Systkina synir veganda sammöðra sculo böta systkina sunum hins dauða sammöðra .iij. peningum vegnum oc hálfan .iiij. eyri veginn. Systra synir veganda sammöðra sculo böta systra sunum hins dauða

  1. ↑ en — mgl. b. f.
  2. ↑ efter — b. d.
  3. ↑ Her mgl. (jfr. Totalsummen) „.iij. peninga vegna oc“ (egentl. 3 1⁄3 pen.).
  4. ↑ Feilskr. f. fiorða.
  5. ↑ [ Mangler i Afskrifterne, men aabenbart kun ved en Forglemmelse.
  6. ↑ Skrivfeil for .xxj.
Hentet fra «https://no.wikisource.org/w/index.php?title=Side:Norges_gamle_Love_indtil_1387_Bd._1_190.jpg&oldid=171625»