Side:Norges gamle Love indtil 1387 Bd. 1 185.jpg

Fra Wikikilden
Denne siden er korrekturlest
Frostathings-Lov. (VI.) 185

giölldum aptr í cné frændom. oc scal hon hvárki síðan baugum böta ne taca. En ef dötr ero .ij. eða fleire. þá koma þær eigi til at taca bötr eða bauga. En svá micit verðr þat nú allt saman er bauga menn taca .ij. ertogum minna en .xviij. mercr vegnar.

Um sacauca.

5   Nú scal til þeirra manna segia er sacaucar[1] ero. sunr þýborenn er sacauce oc bróðer[2] sammöðra. Föðorfaðer oc sunarsunr ef þeir ero báðer til. en þat verðr sialdan. En þó at þeir se báðer til. þá sculo þeir báðer eina bót taca oc svá böta. Sunr þýborenn veganda scal böta syne hins dauða þýbornum .xvij. aurum vegnum. Bróðer veganda sammöðra scal böta bróðor hins dauða sammöðra annat slíct. Föðorfaðer oc sunarsunr veganda sculo böta fơðorfeðr oc sunarsyne hins dauða .xvij. aurum vegnum. En sunum sacauca scal böta ertog oc .xj. aurum vegnum. En sunarsunum sacauca scal böta þriðiunge minna.

Um söctal.

6   Maðr er sá einn er ver höfum eigi fundit í söctale[3] á Frostoþings bóc. en hann er þó hittr í frændseme. oc er eigi firnare en föðor[4] bróðer sammöðra. Varla er sú sætt með heilu gör er slícir sitia fyrer utan oc er váðe vegandanom[5] at eigi er við hann bött. nú er honom her bót ætluð með bróðorsyne sammöðra. oc sculo þeir báðer í ertogi oc .xj. aurum vegnum ef þeir ero báðer til. en annar einn ef annar er til. oc svá böta. en þat verðr allt er sacaucar taca oc syner þeirra oc sunarsyner ertogi minna en hálf .xiiij. mörc vegin.

Mycla nefgilldi.

7   Nú hefr upp mycla nefgilldi oc segir til þess hvat þar scal hverr af öðrum taca eða böta. Móðorfaðer oc dóttorsunr veganda sculo böta móðorföðor oc dóttorsyne hins dauða .ij. mercr vegnar. Móðorbróðer oc systursonr veganda sculo böta móðorbróðor oc systursyne hins dauða .xij. aurum vegnum. Systkinasyner veganda sculo böta systkinasunum hins dauða mörc vegna. Systrasyner vegandans sculo böta systrasunum hins dauða ertog oc .v. aura vegna. Nú verðr þetta allt saman er mycla nefgilldis menn taca .v. mercr vegnar oc .iiij. ertogar vegnar.[6]

Litla nefgilldi.

8   Nú seger til nefgilldis litla hvat þar scal hver öðrum böta eða taca. Sunardóttorsunr veganda scal böta sunardóttorsyne hins dauða .ix. aurum vegnum. Dóttordóttorsunr veganda scal böta dóttordóttorsyne hins dauða hálfum átta eyre vegnum. Bróðordóttorsunr veganda scal böta bróðordóttorsyne hins dauða .vj. aurum vegnum.

  1. ↑ sacauca — b. c. d. f.
  2. ↑ bróðor — c. f.
  3. ↑ söctala — b. f.
  4. ↑ föðorföðor — b. f.
  5. ↑ vegandom — b. f.
  6. ↑ vegner — d. e. f. Hankjönsformen af Ordet ertog (ertogr) findes gjennem hele Loven vexlende med den almindelige Hunkjönsform.
Hentet fra «https://no.wikisource.org/w/index.php?title=Side:Norges_gamle_Love_indtil_1387_Bd._1_185.jpg&oldid=171615»