Side:Norges gamle Love indtil 1387 Bd. 1 128.jpg

128

Ældre

En ef hann gengr or lögréttu fyrir utan vebönd í annan stað þá er hann secr mörc talinni. Þeír menn er í lögréttu ero nefndir scolo döma lög um þau mál er hingat ero skotin at þingscotum réttum eptir því er lögbók segir. oc um þau mál er menn leggia hendr sínar saman fyrir váttum tveim. er þat vitni kemr fram. En allt þat er bóc scill eigi. þá scal þat hafa or hverío máli er lögréttumenn verða allir á eitt sáttir oc réttast er fyrir guði.

Enn um siðsemi á Frostoþingi.

3   Þat er ráð oc boð Eysteins erkibiscops oc ásiá hinna vitrasto manna. at menn scolo fastandi til þings ganga. oc sökia þing [þá er^[1] sól er í austri oc vera á þingi til nóns. En prestr sá er bóc scal ráða hann scal ringia myclo^[2] klocko^[3] þá er hann vill með bóc til þings ganga. en þeirri klocko scal eigi til annars ringia meðan þingit stendr. En ef nöckorr slæzc í mat eða í^[4] munngát oc rökir þat meir en þingit. hann scal enskis síns máls eiga uppreist á því ári hvat máli sem hann á at drífa á Frosta^[5] þingi. Munngát scal eigi til þings^[6] bera hvárki til sölu ne annan veg. En ef borit verðr þá er upptöct oc eigu þingmenn þat.

Um Eyraþing.

4   Eyraþing scolo menn or átta fylkiom eiga á hverium tólf mánaðum. hálfum mánaði fyrir Jónsmessu. en ármaðr scal þingsboð^[7] skera oc scal hverr búandi fara er forverk á ser. eða gialldi mörk úskerða hverr er eigi ferr.^[8] En þing þat er hverium búanda siálfstemnt þó at ármenn^[9] afrökíz. En ármaðr scal ekki um sökía um þat mál er hann skerr eigi þingsboð.^[10]

Um grið til Frostoþings.

5   Nú scal til þess segia hver grið þeir menn scolo hafa er nefndir ero til Frostoþings farar. Nefndar menn oc allir þeir er til þings fara. þeirra^[11] scal í griðum við annan meðan þeir ero í þingför þeirri er þeir fara til Frostoþings. oc þar til er þeir koma til heimilis síns. En ef einnhverr þeirra gengr á þau grið. þa hefir sá fyrirgört landi oc lausum eyri oc friði sínum víð alla menn oc komi alldregi í land aptr.

At lögum se land vúrt bygt.

6   At lögum scal land várt byggia en eigi at úlögum eyða. En sá er eigi vill öðrum^[12] unna. hann scal eigi laga nióta.

1. [þegar — e. [þá — f.
2. mykla — c. e.
3. klocklo — b. f. overalt i Capitlet.
4. í - mgl. b. f.
5. Frosto — c. e. f.
6. Frostoþings — e.
7. þingboð — b. f.
8. færi - c. e.
9. menn — a. e.
10. þingboð — f.
11. Her synes Ordet hverr at være udeglemt.
12. laga er tilföiet med anden Haand og forskjelligt Blæk i a. d. e.