| 96 | Ældre |
manaðom er hon er gift. En ef hon vill eigi rað fa. þa scal hon taca þann mann er hon vill. sér til soknar. oc eigi ofrikismann þeim er keypt hafðe.
291 Nv a mær boð a iorðu. þa scal hon fa mann til. er hon er .xv. vetra. at lysa þvi a þingi. at su iorð er selld er hon a boð a. oc hava brigt a fyrstum .xii. manaðom er hon er gift. En ef þær fara eigi sva at mær oc eckia sem nu er talt. þa eigu þær alldrigi upreist þess mals siðan.
292 Nu kaupir maðr iorð i fiolda manna. þa eigu þingmenn at skeyta hanom iorð. hann skal hinum heim stemna. oc þeðan til þings oc niota vatta sinna a þingi. at hann hafðe hanom rett heim stemnt. oc þeðan til þings. hann a molld at taca sem i logum er mælt. Taca at arenshornom fiorom oc i ondveges sæte. oc þar sem acr oc eng mötezt. oc þar sem hollt oc hage mötezt. oc niota þeirra vatta a þingi at hann hever molld ret tecna. oc hinna annarra er við kaup þeirra varo. Nu ef hanom berst þat at fullu. þa eigu þingmenn hanom með vapna take iorð at skeyta. Hvervitna þess er þeir verða a satter kaupi oc sale at molld er rettekin. þa scal þat hallda. oc sva skeyting at somu. at kirkiu sokn. oc at oldrhusi. at skipi skipaðo. þvi er sessom ma telia. þat scal iamt hallda. sem a þingi se skeytt. Hvervitna sem konongr skeytir iorð. þa scal þat hallda.
293 Nu ef þrot söker þann mann er iorð hever sellt til stemnu. þa scal hann hinum stemna a iorð er keypt hafðe holfum manaðe firi. oc fara i stemnu oc niota þar vatta sinna. at þrot riuva kaup þeirra. oðalnautr scal hava ef hann vill. ellar hinn er keypt hafðe.
294 Nv ero bröðr tveir oc andask annar fyrr en faðer þeirra oc livir sunr efter hinn dauða. þa scal hann þann lut leysa oðrla at fimtungs falle. undan faður bröðr sinum. sem faðer hans stoð til efter faður sinn. En eigi ma hann fyrr leysa en faður faðer hans er andaðr.
295 Konongr[1] skal raða boðe oc banne. oc varom útforum. eigi eigum ver hanom leiðangrs at synia til landzenda ef hann byðr sér til þarva. oc oss til gagns. Nu scolo aller menn þann gera at iamnaðe. sem konongr hever iatt oss.
- Jvfr. Cap. 295. F. VII. 1.
- ↑ Bogstaven K i dette Ord er i Mbr. större end de sædvanlige Capitel-Initialer.
