| Gulathings-Lov | 95 |
286 Nv vill maðr stemnu iorð sina brigða. æða mala iorð. oc er sa utan laga várra er hond hever at. æða utanlandz. þa scal hann undan hallzmanne brigða. En ef hann er eigi til. þa scal undan ervingia brigða. sva sem undan hinum skylldi hann. Nu selr maðr iorð or stemnu. þa scal hann iorð brigða undan hvárom sem hann vill. þeim er hann sellde. æða hinum er hond hever at. Nu scal sva mala iorð at somu. Nu er sa utan laga várra. æða utan landz. er stemnu iorð hever keypt. æða mala iorð oc er hvárke halldzmaðr ne ervingi innan laga várra. þa scal hann a þing fara er brigða vill. oc gera hinum laga stemnu aptr er keypt hafðe. En ef hann kemr eigi i þa stefnu. þa scal hann fara a þing oc niota þar vatta sinna. hvessug þeirra var mælt amilli. oc bioða þa aura. En ef hinn hever engum manne umboðet at taca við. þa have hann oc hirði til sa heimtir at hanom.
287 Nu vill maðr oðal sitt selia. þa fare hann of haust. æða sa maðr er hann hever um boðet a þing oc bioðe iorð oðalnautum sinum at kaupa. biðia þa til koma iarðar þorsdag i pasca vicu. oc kaupa sva iorð sem aðrer menn bioða við. Hann scal þat i þeirri þingsokn gera. sem iorð su liggr i. Nu koma þeir þar baðer þórsdag i pasca viku. oc skilr þa a aura. þa scal sa sveria er iorð vill selia. at hanom er sva við boðet sem hann metr. oc er þat eigi vela boð. Hinn scal oc sveria. at sva vil ec kaupa sem nu er meten. þa scal oðal nautr sva hava ef hann vill. ellar seli hinn þeim er hann vill. Nu kemr sa er kaupa vill. en hinn kemr eigi er iorð bauð. þa scal hann iorð hava at slicu. sem valenkunnir menn meta. hvárt sem hinn vill. æða eigi. En ef hvarge þeirra kemr. þa er iorð sva sem uboðen se. En þa er þeim iorð uheimil er kaupir. ef oðalnautar koma til þorsdag i pasca viku.
288 Nu vill maðr iorð selia til stemnu. æða til mala. þa scal bioða þeim fyst firi vattom er oðrle ero nester. bioða þvi at eins syni sinum ef hann vill.
289 Nu kaupir maðr iorð uboðrna. en oðalnautr er innan fylkis. þa scal hann brigt hava a fyrstum .xii. manaðom. En ef hann er utan fylkis. þa scal hann brigt hava a fyrstum .xii. manaðom. er hann kemr i fylki. En ef eigi er sva brigt. sem nu hevi ec talt. þa a hann alldrigin upreist þess mals siðan.
290 Nu ef eckia a boð a iorðu þeirri er selld er. þa scal hon fa mann til hvern sem hon vill at lysa þvi a þingi a fyrstum .xii. manaðom. oc have brigt a fyrstum .xii.
