| Gulathings-Lov | 93 |
þorsdag i pasca viku. ef hann vill taca við aurum slicum sem vattar vitu at hann reiddi hanom. þa er vel ef þeir verða a þat satter. at hann stemner hanom til iarðar. oc til aura tocu. En ef hann dylr þess. þa scal hann vatta sinna niota. hvessu hann sagðe hanom firi iorðu. oc hvessu hann til auratocu stemde hanom. ef þat bersc at fullu. þa scal hann niota vatta sinna hvessu micla aura hinn a i þeirri iorðu. þa scal hann hanom aura slica bioða. sem vattar hava boret hanom vitni til. þa scal hann veita vorð iorðu sinni. en hinn aurum. þa hever hann iorð sina leysta aptr at skilum. oc at logmale. Nu liggr iorð um stefnu. oc liggr .xx. vetr. oc hava þeir enga lysing þar a. þa er hon at oðrle orðen. þa ma hann dula oðals oc kenna ser. þa scal hann þa iorð veria með dome. hann scal sökia með arofum. Nu ero þeir arovar er við kaup þeirra varo. leysa aurum fullum þa iorð. nema lysing have a verit a þeim .xx. vetrum. Su er full lysing er bæðe iatter kaupe. oc sale.
277 Nu kaupir maðr iorð uboðrna. þa megu oðalnautar þat kaup ripta. Nu segia þeir hanom firi iorðu of haust. þa megu þeir bæðe gera senn ef þeir vilia sva. segia hanom firi iorðu. oc stefna hanom til iarðar þorsðag i pasca viku. Hann ma oc siðarr stefna hanom at miðri fosto hit seinsta. þvatdag þann er .iij. vikur liva fosto. Nu verr hann skiladome kaup sitt. þann dóm skolo þeir a iorðu þeirri hallda er hann hever hanom til stemt. þa scal sa leiða vitni sin fram er söker. hvessu hann stemdi hanom til. at taca við aurum slicum sem vattar vitu með hanom. þa ef hanom bersc þat at fullu. þa eigu þeir at döma hanom iorð. en hinum aura slica sem vattar vitu at hann reiddi hanom. Nu ef hinn kallar boðrna oc leiðir hann vatta þar fram. at iorð var boðen logboðe. þa scal hann iorð hava sem hann keypt hafðe. Nu ef hinn kemr eigi til dóms. þa scal hann bioða aura. En ef hann hever nocorom manne umboðet með vattom. þa scal þeim i hond reiða. ellar hirða aura. oc lata hann eigi fa aðr enn hann söke hann.
278 Nv kaupir maðr iorð til skeytingar. oc tecr skeyting a. þa scolo þeir oðal nautar hans ef þeir ero innan fylkis. oc vilia þeir brigt hava. þa scolo þeir brigt hava a fyrstum .xii. manaðom. ellar scal sa hava er keypt hafðe.
279 Nv kaupir maðr iorð til skeytingar. oc vill hinn eigi skeyta er selldi. þa scal hann fara a þing. oc lata bera vitni at hann hafðe iorð keypta til skeytingar. oc æsta menn vapna tax. at þeir skeyti hanom iorð með vapna take. þa er þat iamfullt sem hann skeytti hanom. ef hann hever mold rett tecna.
