| 88 | Ældre |
skröcvattar. oc af sokn sinni. En ef þeir verða eigi a satter. þa scolo þingmenn skiota dome þeirra veðiaðom a fylkis þing. þa er vel ef þeir verða aller a þat satter. En ef þeir verða eigi a þat satter. vill annarr skiota dome sinum. en annarr vill eigi. þa scal sa þo al hann mege eigi skote orka. þa scal hann þo skirskota lograne þvi er þingmenn hava hanom veitt undir útheraðrs menn. þa er eigi ero þingat þingsoknar menn. þa scal hann þo skiota dome sinum a fylkis þing. En þa er hann kemr þar. þa scal hann fra lograne þvi herma er hann a fiorðongs þingi fecc. Heve ec her þau vitni er ec undir skirskotaða. þau scal hann fram föra. þa scolo þingmenn þeim dóm döma. þa er vel ef þeir verða aller a einn dóm satter. En ef þeir verða eigi a satter. þa vill annarr skiota dome sinum i logretto. en annarr vill una dome fylkismanna. þa scal hinn af þingi ganga er skiota vill. oc afla ser liðrs. En ef hann fǽr af fylkis þingi fiorðong þingmanna. þa ma hann skote orca. En ef hann minna lið fǽr. þa verðr hann at þola dom fylkismanna. Nu hava þeir dome skotet i logretto. þa verða þar aðrer veðiaðer. oc af sinu male. þa taca hinir veð fe sitt undan iamre hende tva aura af hverium þeirra. er veðiaðr var. En þeir scolo böta aurum .iij. hverr þeirra við ærendreka konongs. oc böta sva aptr misdöme sitt. Nu ero vattar hans skröcvattar. þeir scolo böta morcom .iij. hverr þeirra við ærendreca konongs er þat vitni baro. oc bera alldri oðals vitni siðan. Nu hever sa iorð sotta at logum er brigði. þa scal hann fe a iorð bera at miðri fosto. þvattdag þann er .iij. vikur liva fosto. hindar dax of morgon. hann scal þat fe a þann stein leggia er ácr oc eng mötesc. En hann scal sva mæla. at þu ver her a iorðu þórsdag i pascha viku. oc tac við iarðar verði slicu sem menn meta logeyris. Ec man her koma með valenkunna menn. en þu haf halva firi. þeir scolo iorð meta at dömum þeim er menn scolo oðal sitt aptr leysa. þat fe scal halft væra i gulli oc i silfri. en halft i mane herröno eigi ellra en fertogo. ne yngra en .xv. vætra. Sva scal maðr oðal sitt aptr leysa. Nu er su brigð told.
267 En hann a kost annan veg at svara. at forsogn. at ec hevi þa iorð sellda. oc em ec eigi varnar maðr át. at veria þa iorð. þat er þo oðal mitt. En hann scal þa spyria hveim ec hevi þa iorð sellda. En ec scal nemna solu mann minn innan laga várra hvar sem ec vil. þann er ec hevi iorð sellda. En engi a undir lendan mann iorð at skiota. En ef ec þvi svara at ec hava lendom manne iorð sellda. þa scal ec sialfr við vorn ganga. þvi at engi scal bonde iorð undir lendan mann skiota. En ec hevi nu sagt hveim ec hevi iorð sellda. en hann vill eigi nema a þvi tru. oc stemnir mér heim oc ferr til hús mer með vatta oc kveðr mic iarðar. En ec þvi svara sem at forsogn svaraða ec. at ec a ecki i þeirri iorðu. en ec festi hanom þo dom at hvaro. af þvi at hverr maðr scal dom festa mote kvoðu. En hann leggr
