| Gulathings-Lov | 83 |
þo at hann stele lambe netrgömlo. En ef maðr stendr þyfsku i hende manne. þa scal binda fola a bac hanom. ef vattar ero við. oc leiða hann i þa þingsokn sem hann skuld stal. oc föra hann armanne konongs. ef hann vill þat. En ef armaðr tecr eigi við. þa er hann seccr .xv. morcom. En þat fe er armaðr scal giallda. þa scolo böndr eiga allt. þa scal föra lendum manne. en ef hann vill eigi við taca þa er hann seccr .xv. morcom. en þat fe scal konongr hava halft. en böndr halfr. Nu scolo böndr eigi sect giallda armanne. ne lendum manne fyrr en þeir hava sinn rett sottan. Nu scal hinn þa þing kenna. oc leiða þingat þiof með fola bundinn er þiof hever tekit. oc föra fram vitni at sa a fe er batt. oc þar lysti hann þyft efter. Oc vitni annat at hann batt hann a þvi fe. þa scolo þingmenn um döma. Ef þeir döma hann misbundinn. þa er sa seccr er hann batt at .xv. morcom við konong. En ef þeir döma hann rettbundinn. þa scal armaðr fa bana at hanom. hann er seccr at .xl. marca. ef hann vill eigi. þa scolo böndr kaupa bana at hanom or fe hans sialfs. En ef hann gengr með livi i brott. þa scolo bönðr giallda .xl. marca. En ef þeir lata hann ganga udömdan af þingi. þa ero þeir seckir .xv. morcom við konong.
254 Nu stendr maðr fe sitt i hende oðrom manne. þat er þiofstolet er. en hann venesc heimilldar manne. oc kallar kaup sitt. þa scal hann æsta tax firi hann. oc sva firi fe þat er hann kenner ser. oc gera eindaga til. þa scal hann föra fram vitni at þat er hans fe. oc hann gaf eigi ne gallt. oc eigi solum sellde. þa er hanom upnemt. þa scal hann gera hvárt sem hann vill. at fara brott með fe sitt. æða reyna heimilldar taca hans. Nu ef hann brestr hanom. þa er hann þiofr at. Nu kenner maðr oðrom skuld. þa scal hann gera hvart sem hann vill. at stefna hanom heim oc þeðan til þings. æða fara a þing oc lysa þar þyft efter. þa eigu þingmenn at gera hanom heimstefnu til nesta þings ef hann er innan fylkis. þa scal gera hanom laga stefnu. aftr til þings. ef hann er utan fylkis. oc sva um hvert mal. oc eindaga þat þing. Nu ef hann kemr eigi þa berr hann a bake sok. nema nauðsynia vitni bere hanom. Nu kemr hann sialfr a þing. þa scal hann þar eið festa. en ef sa eiðr fellr hanom. þa fellr hann til utlegðar.
255 Nv ef maðr er stolenn fe sinu. oc sér hann manna forveg i fra liggia. þa scal hann ganga efter heraðrs monnom sinum. oc lysa sinu torreke. oc æsta þa liðrs til efter farar. oc spyria til garðz manne. þa scolo þeir sitia utan garðz. oc gera einn til hus oc segia til ærendes. æsta til rannsaks. þa bydr hann þat. oc gengr epter gronnum sinum. þa eigu hinir inn at ganga i skyrtum einum oc lausgyrðir. Nu ef hinn syniar rannsaks. þa sannar hann ser stuld a hendr. Nu ef þeir finna fola
