238 Misvigi scal nu telia. Ef maðr hoggr i kinn. æða i kamp. þa liggr við iaxl hvern eyrer. En ef maðr fellir lik i elld. æða i a. böte aurum .xii. sva firi daudz mannz sár hvért. Sva ef maðr sezc firi annan þar sem hanom liggr forað við. a aðra hond. æða við baða bruar enda. scal hann annat tveggia ganga a odd æða eggiar. æða firi forað niðr. firi þat scal giallda aura .xii. En ef maðr berr hofuð fra bul. ef han hever af hoggit. þat heiter ofrán. þar scal giallda mercr .iij. firi. En ef maðr fellir lik i vatn sva diupt at væta verðr hofuð sitt fyrr en hann kome hans hofðe upp. þa scal böta .iij. morcom. Rette scal böta fullum ervingia ef maðr lystr ofundar hogg oc sva firi misvigi oll.
239 Þeir ero tveir namagar er maðr a dottor mannz. þeirra tecr hvárr a öðrum .xii. aura. af viganda. En ef maðr a systur mannz. þa tecr hvárr a öðrom .vi. aura af viganda. En ef hvárr a annars systur. þa tecr hvárr þeirra a öðrom .xii. aura. af viganda. Nu a stiupfaðer. oc stiupsunr hvárr þeirra a öðrom .xii. aura af viganda. Nu ero eiðbröðr. þeirra tecr hvárr. a öðrom .xii. aura af viganda. Nu ero fostbröðr tveir föddir upp saman. oc hava druckit baðer speina einn. þa tecr hvárr a öðrom .xii. aura af viganda. Nu er moðor faðer moðor mannz. þeirra tecr hvárr a öðrom .xii. aura. af viganda .x. alna eyris. ef haulldr verðr viginn.
240 Ðat er misvigi hit fyrsta ef maðr er viginn ofgum vapnom. oc lostenn tvau hogg. þat ero tvau misvigi. En þat er hit þriðia misvigi ef maðr er lostenn krocoro. æða krocspiote. oc þarf at skera til. En þat er hit fiorða ef sór ero fleiri en .vii. En þat er hit fimta ef maðr er dauðr hoggvinn. oc kemr eigi bloð út. En þat er hit setta ef lik er rent. En þat er hit siaunda ef maðr er veginn þa er hann gengr þarva sinna. En þat er hit atta ef maðr er felldr i elld. En þat er hit niunda ef maðr er felldr firi berg. En þat er hit tiunda ef maðr er felldr i vatn. En þat er hit ellifta ef eigi er liki borget. oc falla a rafnar oc rædyri. En þat er hit tolfta ef viglysing er eigi full oc verðr þo eigi at morðe. En þat er hit .xiii. ef sætt er boðen a þingi hinu fyrsta. sva hátt at heyra ma ivir þingring þveran. þa er rosat vigi. En þat er hit .xiiii. ef sætt er eigi boðen innan .xii. manaða. þa er seint boðen. En .iii. mercr liggia við hvert mal þeirra er nu er talt.
241 En ef hofuð er hoggvit af. oc sett a garðstaur æða sparre i munn. oc reist við gatna mót. æða lic hverft a grufu. ae stungit hofðe milli fota. þa aukasc giolld holfo.
