| 62 | Ældre |
eigi kenna manne. nema hann fylgi orum. oc se mælt a hendr hanom a þingi. Tveir scolo þat bera at hann fór þar i heraðe. sva at hann matte við þat vig komast. þeir scolo bera um natstað hans. þvi at eins þarf um natstað at bera. ef annarr se a orvar lagðr. en annarr lysti vigi a hendr ser. Nu kennir ervingi öðrom. helldr en hanom. þa scal sa hava lyritar eið firi sér. Na scal hann fara til þings. oc æsta ser þinggongu. oc leggi niðr vapn sin. oc bioða log firi sik. festa þar lyritar eið a þingi. fellr til útlegðar. Ef þeir synia hanom þinggongu. þa helga þeir hann oc eyri hans allan. En ef hann lysir annan veg. þa lysir hann morðe a hendr ser. Bera ma sogn hinna. oc hverr frialsra manna.
157 Þat er nu ef maðr er viginn i oldrhusi at brennanda elldi. æða i dax liose. þa scolo olhusmenn fa bana at þeim manne. æða giallda hann aptr giolldum fullum bæde frendum oc sva kononge. Nu er maðr vegenn a nattar þele at sloknom elldum. nu ef þar er vigi lyst of morgonenn er menn vacna. þa er sa bane. en at ulystu vigi ef þar er einnhverr a brotto. þa er sa bane. Nu ma hann segia til ærendes. æða koma aptr of morgon. Nu ef þeir ero þar aller. oc er engi annarr likare til en annarr. þa scolo olhus menn morð spyria. en ervingi kenne þeim er hann vill. sa scal hava morz eið firi ser. Nu ef eiðrinn fellr hanom. þa fellr til utlegðar. En ef hann eið vinnr at skilum. þa er ervingi kost at kenna öðrum. þvi at eins hinum þriðia ef hann gerir þann sannan at. Ef hann ma eigi gera hann sannan at. þa scal hann hava slict sem hann hinum hygði.
158 Nv fara menn tveir saman at fe fongum ser. oc ero matunautar oc felagar. ef annarr er þar drepenn. þa scal hinn sökia fund ervingia. oc segia til hinum fýsta manne er hann hittir. Ervingi kenner hanom at hann have drepet matunaut sinn. þa scal hann synia með iarnburði.
159 Ef karlmaðr drepr kono. þa verðr hann sva utlagr um sem hann karlmann vege. En ef kona vigr karlmann. þa er hon utlog oc scolo frendr hennar föra hana af lande. oc sva ef umage verðr mannzbane. hann scal oc föra af lande. oc frendr hans kome hanom a for firi fimt. oc væra þar með þeim netr .v. nauðsynialaust. Ef lengr er giallde .xl. marca. æða syni með lyritar eiði.
160 Þat er i þrim stoðum er dauðum ma sok geva. þat er i einum stað er maðr hittir mann a kono þeirri er hann a vig um at viga. En þær ero konor .vii. Ein
- Jvfr. Cap. 157. F. IV. 14. Cap. 158. F. IV. 6. Cap. 159. F. IV. 33.
