56 | Ældre |
scolo fara til þings er boð kemr til hus. ellar giallda þingviti. Nu ef maðr letr standa þingboð sva lenge sér a hende. at þat ferr eigi sva lagnt fram. þem þat a at fara. þvi at þat stoð sva lenge hinum a hende er bera skylldi. þa er sa vittr er boðet skylldi bera. þo at boð kome siðarla til þeirra manna er lengst eigu at fara. þa scolo þeir til þings fara til þeir möta þingmonnom. Nu ef menn ero .v. æða .v. fleiri. aller firi einni söc. þa ma boð stemna þeim þing. ef þeir ero a lagðer firi vattom.
132 Tylftar eiði scal synia. ef konongr kenner manne landrað. Sva scal morðz synia oc tryggrofs. Nu scal nemna .vi. menn a hvára hond hanom iamna at rette við hann. oc hava tva af þeim. oc tva nanasto niði. sialfr hinn fimti. oc .vii. fanga vattar.
133 Settar eiðr scal standa firi þýui. oc bruna. oc spellvirki. oc treniði. oc tunguniði. oc udaða verc firi konor. oc þva firi niðings her. sva ef hefnir þiova. Nu scal nemna menn .vi. a hvara hond hanom iamna at rette við hann. oc hava tva af þeim firi þýui oc bruna. einn oc alla aðra settar eiða.
134 Nu er grimu eiðr. nemna menn .iij. a hvara hond hanom. iamna at rette við hann. hava alla. sialfr scal hann hinn siaunde væra.
135 Nu scal lyritar eið sva vinna. sialfr scal hann vinna oc annarr iamrettesmaðr hanom. eigi nefgilldismaðr. ne baugilldismaðr. ne namágr. Sa scal hinn þriði er bæðe kann at hyggia firi orðe oc eiði. frials maðr oc fulltiða. Nu scolo eiðar aller standa .x. vikur svörra daga. þa er oll vica svör. þo er einn dagr se svörr i. Tylftar eiðar aller falla til ubota. oc grimu eiðr. oc þyui. oc bruna. Aller aðrer settar eiðar falla til utlegðar. Lyritar eiðr fellr til slics sem hann er festr firi. Eineiði scal þegar vinna er hinn vil heyra er festr var. oc hever bóc at bioða hanom.
136 Nu er vel ef þeir verða a satter. nér vinna scal. ellar stemni hann hanom til fim nottom hit skemsta firi. til kirkiu þeirra er hann vill innan fylkis. Nu kemr sa eigi. er eið skal heyra. niote hinn vatta sinna firi kirkiudurum. at hann stemdi hanom þingat til. oc vinni þa eið firi vattom. Nu komar þeir baðer þar. hinn er eið scal vinna. oc sa er heyra scal. þa scolu þeir nemna menn til. tva hvárr þeirra
- Jvfr. Cap. 132. 133. 135. F. XV. 1–16. Cap. 136. F. IV. 7.