| Gulathings-Lov | 47 |
hann kveðr nei við. þa scal hinn fara til heimilis hans. oc stemna hanom þing firi utlegð oc brenno. þa scal hann festa settar eið a þvi þingi. hava þann uunnit a .x. vicum svörra daga. fellr til utlegðar ef fellr. Nu ræðr maðr brenno. oc verðr hann at þvi kunnr oc sannr. þa scal hann giallda halft þat aptr er brunnit er. Nu ef han kveðr nei við. þa scal hann synia með lyritar eiði. fellr til halfra giallda.
99 Sinn elld scal hverr abyrgiazt frialsra manna oc fulltiða. þann a elld hverr er i hende hever. oc kveikvir siðan. Nu brenner maðr. oc brenner eigi heiftugri hende. Giallde þat aftr allt. æða syni með lyritar eiði. ef hann kveðr nei við. Ef umage brenner firi manne. giallde halft aptr. en ef hann kveðr nei við. syni með lyritar eiði sa er umaga a. nu brenner man mannz heiftugri hende. þa er hann utlagr. Enn ef hann kveðr nei við. syni lyritar eiði drottenn hans. En sa eiðr fellr þræle til utlegðar.
100 Nu er salo hus ollom monnom iamheimillt. Nu er vel ef aller megu inni væra. oc fot þeirra. En ef eigi megu aller inni væra oc fot þeirra firi þrong. þa scolo aller út bera fot sin. þa er vel ef þeir hava þa rúm. þeir scolo aller inni væra ef þeir hava setu rúm aller. Nu ef nokorer hava verit .iij. netr nauðsynia laust. þa scolo þeir út ganga. ellar scolo þeir luta mann út. þa er vel ef þeir vilia út ganga er lutu. En ef þeir vilia eigi þa ero þeir seckir at ránbauge. er út lutu at ganga. oc villdu eigi. þeir scolo giallda hina fullum giolldom aptr. er þeir deyia uti er inni lutu at væra. Ef menn bua i salo husi. oc brennr þat up. abyrgizt þeir aller er i varo.
101 Ef maðr vinnr i veizlu iorð mannz. söke hann til landnáms. oc have halft. ellar söke armaðr konongs allt.
102 Hvervitna er menn scolo gera laga stemnu manne a þingi. þa scal gera halfs manaðar stemnu innan fylkis oc utan fiorðongs. Manaðar stemnu utan fylkis oc innan laga várra. Tveggia manaða stemnu innan landz. oc utan laga varra. Tolf manaða stemnu ef maðr er utanlandz. Nu er ervingi skylldr til at gera hanom boð. ellar þingmenn. ef eigi er ervingi a þingi. Viðrmæles er hverr maðr verðr. Nu æster maðr tax annan. Nu scal engi oðrom tax synia. fa honom tac samdögres. En ef hann vill eigi fa. þa er hann seccr .iij. morcom. varðar bu hans take. ef hann þat bu a. er þriggia marca er vert. þa scal hann væra manað i þvi take. ef hann æster laga tax. En ef hann a eigi þriggia marca bu. þa scal sa ganga i tak firi
