| 44 | Ældre |
gjallda ranbaug. Nu ef iorð liggr eigi samtynis. þa scal hann þo at hvaro hava. ef hann hever sina iorð alla fyrr er hann a. oc liggr samheraðrs. oc banna eigi fioll ne firðir. ne ár uförar.
89 Nu skilr menn a marcreinu innan garðz annattveggia a ácr æða a eng. Nu mæler annarrtveggia sva. at hann hever um þat uunnit. er hann atte at vinna. oc hever iorðu stolet. oc marcsteina up gravet. þa scolo þeir menn tilkalla þa er kunnast er um marcreino þeirra a milli. þa ef þeim synizt at marcsteinar stande rett. sem niðr varo setter firi andvorðu. bioða þeir vitni sitt. at marcsteinar standa rett. þa er vel. Nu ef marcsteinar ero uppgrafner oc setter eigi niðr. oc uunnit um. þa scal hann giallda aptr loð oc landnám þeim er iorð a. Nu ef hann hever up gravet marcsteina oc sett niðr i öðrom stað. oc fört a lut hins er i mót hanom a. þa er hann iarðar þiofr. oc utlagr.
90 Ðioðgata oc sætr gata oc aller recstar[1] scolo sva væra sem legit hava at forno fare. Nu liggr þioðgata um bö mannz þa ma hann af föra bö sinum. með þeim koste at hann geri aðra utangarðz iamgoða at fara i þurru oc i vato. þa scal þa fara þo at su se lengri. Nu scal þioðgata væra sva breið. at maðr skal sitia a heste soðrlaðom. oc setia a iorð niðr geirskapt. taca up þumalfingri til fals. oc se spiot spannarlagnt fram i fra. þat scal leggia niðr um þvera gotu. scal hon væra eigi breiðare. En ef hann spillir viðare acre. æða eng. þa scal hann giallda þat aptr. Nu rener maðr annan sætrgotu. þa scal hann giallda kononge .iij. mercr. oc sva firi handrán at somu. Nu brytr maðr bru af þióðgotu. geri aptr iamgoða sem aðr var. oc leggi a mercr .iij. hinum er bru atte. Nu rener maðr annan sætrgotu. æða recstre þvi er verit hever at forno fare. böte bauge kononge. oc scal hinn hava gotu iamt sem aðr.
91 Nu a leysingi at landname. ef hann a iorð. skatzvaran eyri innangarðz. en sun hans eyri. Boande halvan annan eyri. Haulldmaðr .iij. aura. Lendr maðr .vi. aura. Jarl .xii. aura. Konongr .iij. mercr. Innangarðz a hverr sem nu hevi ec talt. holfu minna eigu menn utan garðz. Eykzt landnám at holfo ef firiboðet er. oc ranbaug kononge. Nu scal landnám taca at uskiptri iorðu aller menn eitt. taca at þeim er baztr a i iorðu þeirri. taca at kononge ef hann a i. En ef iorðu er oðals skipti skipt. þa tecr fullt landnám hverr at sinum luta. Nu ferr maðr i morc
- Jvfr. Cap. 91. XIII. 15.
- ↑ Rettere recstrar.
