| Gulathings-Lov | 39 |
Af iorðu ma maðr ecki veita. nema tvau loss viðar oc eitt skafs. þat a leiguliði at leyfa. oc sva landzdrottenn. þo at hinn vili eigi. er leigt hevir iorð. Nu ef haucar bua i morco. þa scal sa hava er leigðt hever iorð. nema hinn skili undan. Engi scal annars hauca taca. nema landname vili firi böta. oc föra hauca aptr. En ef hann tecr hauc bundinn i reiðri. þa er hann þiofr at. ef hinn hafðe lyst firi vattom at hann hafðe bundna. Nu a sa averca er iorð hever leigðt. ef eigi er meira vert en halfrar mercr. ef hann segir landzdrotne til. En eigi ef hann leynir hann. enn hinn böte landname er i orte. Jorð scal at þvi nyta. at gera skip til þurftar sinnar. þat er eigi ma sessom telia. En ef hann gerir þat skip er sessom ma telia. þa gerir hann þat þeim er iorð a. Næfrar scal hann eigi liosta til solu. nema hann þurvi at kaupa ser svarta sallt. Sallt scal hann eigi meira gera. en hann þarf at geva bufe sinu. nema han þurfi næfrar at kaupa ser. Tioru scal hann eigi meiri gera. en hann þarf at bræða skip sin með. Samkundu scal engi maðr gera a iorðu mannz. nema sa þurvi olgerðar er leigt hever. En ef gerer giallde mercr .iij.
76 Nu leigir maðr iorð. oc vill eigi hava er hann hever leigða. þa scal hann fara til er .v. netr ero til stoðu. oc sa þa iorð. oc nyta sér sva sem hinn hefðe eigi leigða. oc heimta leigu af hinum er tecna hafðe.
77 Nu ferr maðr a iorð mannz. oc tecr eigi heimilld af þeim er a. þa scal gera hanom fimtar stemnu af. oc leysa sitt með landnáme af. þa ef hann vill eigi af fara. þa scal stemna hanom til þings firi rán. þa eigu þingmenn at döma hanom er iorð a. allt þat er a iorðu er firi utan frialsa menn. oc ranbaug kononge. Nu vill hinn eigi af fara. þa scal hann krevia þingmenn þva marga. at hann se fulliða at föra hann af iorðu. seccr er hverr at .iij. aurum. er eigi vill fylgia hanom. Armaðr konongs er skylldr til at fara. oc oðrlazt með þvi baug.
78 Nu selr maðr eina iorð tveim monnom. sa scal hava er fyrri toc. oc hvervitna þess er maðr selr tveim monnum hit sama. þa scal sa hava er fyrri kaupir. æða leigir. hallda skiladome firi oc niota vatta sinna. at hann toc fyrri. aðra skal hann hinum fa. ef hann hever til. æða giallda handsalsslit .vi. aura. En ef hann a þa eina er hann byr a. þa scal hinn hava. en eigi sialfr hann.
79 Nu selr maðr eina iorð a leigu. oc vill eigi lata hann hava er toc. þa scal hann stefna hanom. hvárt sem hann vill þing. æða a kaupreinu. oc niota vatta sinna
- Jvfr. Cap. 78. F. XIII. 17.
