| Gulathings-Lov | 27 |
sva er hervitna sem maðr selr annars eign. þa scal hann at hvarom heimta sem hann vill. þeim er selldi. æða þeim er keypt hever.
50 Nu leggr maðr oðrom veð firi einnhvern lut. þa scal sa abyrgiasc veð er tecr. En ef þeir hava gorvan eindaga til ner út scal leysa. þa scal hann bioða i eindaga. oc hava vatta við. En ef þa leysir engi maðr út. þa er þat forveðia orðet. Nu ef maðr a fe at heimta at oðrom. oc tecr hann veð fear sins i einum hverium grip. hvárt sem þat er i iorðu. æða öðro fe. Nu selr hann veð i brott öðrom manne. þa scal sa hava vatta til veðrs sins er veð atte. a fyrstum .xii. manaðom ef hann er innan fylkis. En ef hann er eigi innan fylkis, þa have hann brigt a fyrstum .xii. manðom er hann heim kemr i fylki. ellar a hann þess mals alldrigi upreist. Nu selr maðr tveim monnum eitt veð. þa er sa veð er fyrri toc. oc vitu þat vattar. en þeim er kaupfox er siðarr toc.
51 Ðat[1] er nu þvi nest at vér scolom konor kaupa með mundi. þess at barn se arfgengt. þa scal maðr festa með kono þeirri .xii. aura oreigi mund. oc hava við þatt vatta. oc have hann bruðmenn en hon bruðkonor. oc geve henne giof of morgon. er þau hava um nott saman verit. slica sem hann festi við henne. þa er barn þat arfgengt er alet er siðan. Nu er þat þvi nest at maðr vill afla ser. kvanfangs þess er meira kemr til. þa scal faðer sialfr festa dottor sina. ef hon er mǽr. en broðer ef faðer er dauðr. Nu vill faðer eigi gifta dottor sina manne þeim er fest hafde hana. þa scal hanom heim stefna. oc gera hanom eindaga til. at hann vill festarkono sina hava. Nu ef hinn vill eigi lata hann hava. þa scal hann krevia út festar kono sinnar. oc stemna hanom þing firi rán. þa eigu þingmenn at döma hann útlagan. Engu ræðr mǽr um þat. ef hon flýr hvergi siolfr. Hallda ma maðr festar kono firi festarmanne .xii. manaðe. sa er firi scal raða. þat ma skilia festarmal. ef horundfall kemr a annat tveggia. En ef maðr legst með festar kono sinni. þa scal hann böta rette ervingia hennar. oc ganga at eiga siðan. Eckia scal siolf festa sic. oc hava frenda rað við. þa ma hon eigi riuva. En ef eigi er frenda rað við þa ma hon riuva og giallda mercr .iij. at handsalssliti. þeim er festi hana. Sina festar kono scal hverr hava. ef þa festir er firi scal raða. En ef maðr festir manne kono. þa er hann scal eigi firi raða. þa scal hann giallda .iij. mercr. þeim manne er þa kono hafðe festa. Nu scolo bröðr raða firi systur sinni tveir æða fleiri. þa festir einn þeirra hana manne. nu vilia hinir riuva. þa scolo þeir luta hverr firi scal raða. ef þa lytr er festi þa scal hallda. en ellar eigi. oc giallde hinn mercr .iij. at handzsalssliti. En ef annattveggia verðr siuct. æða sárt. þa scal biða
- ↑ Bogstaven Ð i dette Ord er i Mbr. större end de sædvanlige Capitel-Initialer.
