Drótning himins ok iarðár, sæl ok dýrlig mær Maria, móðir dróttins Jesu Kristz, blómi hreinlífis, herbergi heilags anda, öllum helgum mönnum œðri, helgari ok háleitari, er komin at kynferði af konungligri ætt, eptir því sem segir enn göfgi kennimaðr ok enn dýrligi prestr Jeronimus[1], ok tók hann þat af frásögn Matheus guðspiallamannz, fyrir þvi at hann tók i upphafi síns guðspiallz at telia ætt dróttins Jesu Kristz frá David konungi ok Abraham höfutfeðr. Ok nefnir Matheus þvi fyrr Davið konung, at konungdómrinn merkir eilíft ríki ok eilífan guðdóm allzvalldanda guðs, ok þvi Abraham siðarr, þó at hann væri fyrr í heimi, at guð hét honum at táka á sik manndóm ok láta beraz or hans ætt [ok frá hans ættmönnum[2] i þenna heim. Ok var því María drótning bæði konunga kyns ok kennimanna kyns, at hon fœddi þann son, er bæði er konungr ok kennimaðr, konungr í guðdóms velldi ok kennimaðr í písl sinni, þá er hann fœrði sik siálfan í fórn guði feðr á krossinum helga.
María var borin í borg þeiri, er Nazareth heitir, ok fœdd upp í Jórsalaborg ok lærð i guðs musteri. Ok þegar er hon kunni grein góðs ok illz, þá lagði hon alla ást á guð, svá at hon var ávallt í guðs[3] þiónostu, annathvárt
